مەرگەساتى کیمیابارانکردنی هەڵەبجە لەیاد ناکەین

لە (37)هەمین ساڵیادى کیمیابارانکردنى هەڵەبجەدا، رێز و وەفادارى قوڵمان بۆ ڕۆحى 5 هەزار شەهیدى بێتاوان دووپاتدەکەینەوە کە لە چرکەساتێکى تاریکدا وەیشومەى ژەهرێکى کوشندە هەناسە و گەرووى گرتن.

لەسادەترین مانادا کیمیابارانکردنى هەڵەبجە گوزارشت لە کۆمەڵکوژییەکى دڕندانە دەکات کە لەلایەن ڕژێمى بەعسى لەناوچووەوە بە بەرنامەیەکى وورد و پلان بۆ داڕێژراو کارى لەسەر کرا، گومانى تێدانییە ئەو تاوانە مرۆییە لەچوارچێوەى زنجیرەیەک بەرنامەى پێکەوەبەستراودا پۆلێندەکرێت کە لە هەشتاکانى سەدەى ڕابردوو قۆناغ بە قۆناغ بەرامبەر بە گەلى کورد جێەجێکران.

لەپاڵ شاڵاوى بەدناوى ئەنفال؛ کیمیابارانکردنى هەڵەبجە هێمایە بۆ ترۆپکى خەبات و قوربانیدانى گەلێکى ستەمدیدە کە بەدرێژایی مێژوو گەلانى سەردەستى ناوچەکە هەوڵى پاکتاوى نەژادییان داوە، بۆیە لەم چرکەساتە غەمبارەدا یادى ئەو مەرگەساتە لەبیرنەکراوە دەکەینەوە و سەرى ڕێز و وەفادارى بۆ شەهیدان و بەرکەوتووانى ئەو تاوانە مرۆییە دادەنەوێنین، لەهەمانکاتدا بە ئەرکى حکومەتى فیدراڵى عێراقى دەزانین قەرەبووى زیانلێکەوتووانى کیمیابارانکردنى هەڵەبجە و تەواوى ئەو کارەساتە مرۆییانە بکاتەوە کە ڕژێمى پێشووى عێراق دەرهەق بە نەتەوەى کورد ئەنجامى داون.

بەڕێوەبەرایەتیی گشتى شارەوانییەکانى سلێمانى

16-3-2025