14 هەزار و 270 فۆڕمى زەوى گەڕاوەتەوە
لە سەرەتاى دەرچوونى فەرمانى پێدانى زەوى بە فەرمانبەرانى حکومەتى هەرێمى کوردستان، پڕۆسەى پڕکردنەوەى بەڵێننامە و فۆڕمى زانیارى فەرمانبەرانى وەزارەتەکانى پەروەردە و خوێندنى باڵا و پێشمەرگە و شارەوانى و گەشتوگوزار و چەند وەزارەتێکى تر لەسنورى پارێزگاى سلێمانى جێبەجێکرا و پاشان ئاراستەى وەزارەتى شارەوانى و گەشتوگوزار کرا.
دواى ناردنى فۆڕمەکان بۆ وەزارەتى شارەوانى و گەشتوگوزار و دەرچوونى فەرمانى ئەنجومەنى وەزیران بۆیان، لەئێستادا فۆڕمەکان گەڕاونەتەوە بۆ بەڕێوەبەرایەتیى گشتى شارەوانییەکانى سلێمانى، ژمارەى فۆڕمەکان 14 هەزار و 270 فۆڕمە و بەسەر فەرمانبەرانى سنورى پارێزگاى سلێمانیدا دابەشبوون، لەئێستادا هۆبەى زەوى و زار و موڵکایەتى بەڕێوەبەرایەتى گشتى شارەوانییەکانى سلێمانى سەرقاڵى جیاکردنەوەى فۆڕمەکانە و تائێستا زیاتر لە 3 هەزار فۆڕم جیاکراوەتەوە.
بڕیارە دواى جیاکردنەوەى تەواوى فۆڕمەکان و لەسەر بنەماى شوێنی نیشتەجێبوون بەپێی کارتی زانیاری فەرمانبەرەکان؛ فۆڕمەکان ئاڕاستەى شارەوانییە پەیوەندیدارەکان بکرێن تاکو ڕێوشوێنى پێویستیان بۆ بگیرێتەبەر.
